POLICE HIDE GANG RAPE

पुन्हा कोठेवाडी: तरूणींवर बलात्कार ताराचंद म्हस्के , शिर्डी
पुरोगामी महाराष्ट्राला काळीमा फासणारी कोठेवाडी सारखी निंदनीय घटना पुन्हा याच नगर जिल्हयात शनिवारी घडली. अकोले तालुक्यात विरगाव येथे पहाटेचे वेळी सहा दरोडेखोरांच्या टोळीने घरातील चार वृध्द महिलांना विवस्त्र करुन त्यांच्या समोरच या नराधमांनी दोन तरुण महिलांवर आळीपाळीने सामुहिक बलात्कार केला. वाढत्या गुन्हेगारीला रोखण्यात अपयशी ठरलेल्या नगर जिल्हा पोलीसांच्या अब्रुची लक्तरे पुन्हा एकदा वेशीवर टांगली गेली.
संगमनेर रोडवर अकोलेपासून एकरा किलोमीटर अंतरावर नामदेव नाईक (नाव बदलले आहे) यांचे विरगाव फाटयाजवळ घर आहे. त्यांना सात विवाहित मुली असून मुलगा नाही. ते व पत्नी असेच दोघेच राहत होते. पाच दिवसांपूर्वी वृध्दपकाळाने त्यांचे निधन झाले. वडिलांच्या निधनामुळे त्यांच्या दोन तरुण मुली माहेरी आलेल्या होत्या. घरात पुरुष कोणी नसल्याने आई व इतर तीन नातेवाईक महिला सोबत घरात झोपलेल्या होत्या.
शनिवारी पहाटे दीड वाजेच्या सुमारास सहा दरोडेखोरांनी घरावर दरोडा टाकला. ६० ते ६५ वयोगटातील चार वृध्द महिलांना अगोदर बेदम मारले , नंतर त्यांना विवस्त्र केले व त्यांच्या समोरच दोन तरुण महिलांवर (वय २७ व ३२ वर्षे) आळीपाळीने सामुहिक बलात्कार केला. तुम्हांला आई-बहिणी नाही का ? तुम्ही हे पाप कोठे फेडणार ? आमच्या लेकींवर असे काही करु नका अशी विनवणी आईने केली पण नराधमांनी त्याकडे दुर्लक्ष केले व दोन तास बलात्कार करत राहिले. यावेळी दरोडेखोरांनी तीन तोळयाचे सोन्याचे दागीने व पाच हजारांची रोकडे असा ऐवज घेवून पळून गेले . जातांना घराचा दरवाजा बाहेरुन बंद केला.
या धक्कादायक प्रकारामुळे भयभित झालेल्या या महिला रात्रभर जाग्या राहिल्या. सकाळी ही घटना शेजारच्यांना व नातेवाईकांना सांगितल्यावर सर्वांनाच धक्का बसला. या अत्याचारीत कुटूंबाला तातडीने अकोले येथील ग्रामीण रुग्णालयात उपचारासाठी हलविले. तेथे रुग्णालयात दोघींवर बलात्कार झाल्याचे निष्पन्न झाले आहे.
पोलिसांचा खोटेपणा उघड
सर्वांची मान शरमेने खाली घालायला लावणा-या धक्कादायक घटनेबाबत नगरचे पोलीस प्रशासन फारसे गंभीर नाही. नगरचे जिल्हा पोलीस प्रमुख कृष्णप्रकाश यांनी खरी माहिती दडविण्याचा प्रयत्न केला. बलात्कार झाला पण सामुहिक नाही व इतर महिलांना विवस्त्र केले नाही असे त्यांनी पत्रकारांना सांगितले पण अत्याचारीत कुटूंबातील एका महिलेने दिलेल्या माहितीनुसार चार दरोडेखोरांनी दोघीजणीवर आळीपाळीने बलात्कार केला व चार महिलांना विवस्त्र करुन हाणमार केली असे सांगितले.त्यामुळे पोलीस खरी माहिती दडवून ठेवत असल्याचे उघड झाले आहे.
कोठेवाडीची पुनरावृत्ती
नगर जिल्हयात १६ जानेवारी २००१ रोजी अकरा दरोडेखोरांनी कोठेवाडी (ता.पाथर्डी) येथे तीन महिलांवर सामुहिक बलात्कार केला होता. त्या घटनेने अख्खा महाराष्ट्र हादरला होता. त्या निंदनीय घटनेच्या कटु आठवणी जीवंत असतांना शनिवारी विरगांव येथे घडलेल्या महिलांवरील सामुहिक अत्याचार प्रकरणामुळे पोलीसांच्या अब्रुचे पुन्हा एकदा धिंडवडे उडाले आहेत. नगर जिल्हयात दरोडे , बँक लुट , बलात्कार , चो-या या गुन्हयात मोठी वाढ झाली असून त्यांना रोखण्यात जिल्हा पोलीस प्रशासन कुचकामी ठरले आहे.
बापाचे दु:ख आणि बलात्कारचे चटके
वडिलांचे निधन झाल्याने पोरक्या झालेल्या लेकी आईच्या मायेसाठी माहेरी आल्या असतांना नराधम दरोडेखोरांनी त्यांच्यावर बलात्कार केल्याने हे कुटूंब अक्षरश: भयभित झाले आहे. त्यांना रडूही कोसळत नाही आणि तोंडातून शब्दही फुटत नाही इतके ते घाबरले आहे. या धक्कादायक व निंदनीय घटनेने सर्वत्र खळबळ माजली आहे.
राज्यात कायदा सुव्यवस्था धोक्यात - शिवसेना
या घटनेने धक्का बसला असून या राज्यात कायदा सुव्यवस्थेचे तीन तेरा वाजले आहेत अशी टीका शिवसेनेच्या प्रवक्त्या आमदार डॉ. नीलम गो-हे यांनी केली. म.टा. शी बोलतांना त्या म्हणाल्या दरोडे नियंत्रक पथकाचे काम सक्षम न झाल्याने या राज्यात गुन्हेगारी नियंत्रणात आलेली नाही. नगर. पुणे , बिड , परळी , परभणी , नाशिक येथे बलात्कार व महिला अत्याचाराच्या घटना वारंवार घडत आहेत. विरगाव येथील अत्याचारीत कुटूंबाला भेटण्यासाठी रविवारी मी जाणार आहे असे त्यांनी सांगितले